Maombi ya Kujiunga na Masomo Kufanyika kwa Njia ya POSTA

Posted on: May 28th, 2022

Chuo cha Serikali za Mitaa kimeanza kupokea maombi ya wanafunzi wanaotaka kujiunga na masomo kwa mwaka 2022/2023 kwa njia ya posta. Hayo yamesemwa na Mkuu wa Chuo, Dkt Mpamila Madale leo Jumamosi alipokuwa akizungumza na maafisa udahili chuoni hapo.

Dkt. Mpamila Madale amesisitiza kuwa njia hii itawezesha watanzania wote wenye sifa na nia ya kujiunga na masomo kwa mwaka 2022/2023 katika Chuo cha Serikali za Mitaa kufanya maombi kwa wakati na bila usumbufu wowote.

"Waombaji wapakue fomu, waijaze, walipie ada ya maombi sh.10,000/= kwa control number iliyoko kwenye fomu, kisha waitume kwa posta au waiwasilishe kwa mkono chuoni Hombolo au Kampasi ya Mjini iliyoko Area C, jijini Dodoma." Alisisitiza.

Akizungumza kuhusu udahili wa wanafunzi kwa mwaka 2022/2023, Naibu Mkuu wa Chuo -Taaluma, Dkt. Michael Msendekwa amewataarifu watanzania kuwa Chuo kinamazingira mazuri na rafiki ya kujifunza na kufundishia. Chuo kina madarasa ya kutosha yenye miundo mbinu ya kisasa ya kielekroniki inayowarahisishia wanafunzi na walimu kutimiza malengo yao kwa ufanisi mkubwa wawapo darasani.

"Chuo kina walimu wa kutosha na maktaba yenye vitabu vya kutosha. Pia, tuna miundo mbinu ya TEHAMA ambayo inawawezesha wanafunzi kupata huduma ya intaneti bure wawapo mazingira ya chuo" aliongeza.

 Wanafunzi watarajiwa wanaweza kupakua fomu maombi ya kujiunga na masomo kwa mwaka 2022/2023 kwa kubonyeza HAPA

Pia, kwa Dodoma Mjini, fomu zinapatikana ofisi za Wizara  Ofis ya Rais-TAMISEMI, Kampasi ya Mjini (Area C) na Chuoni Hombolo.