LGTI YATOA MAFUNZO KWA WATUMISHI WAPYA

Posted on: April 12th, 2022

Watumishi wa Umma wameshauriwa kuwa mahiri kwenye utumishi wao hasa kwa kuzingatia sheria na kufanyakazi kwa uwadilifu ikiwemo kutumia vizuri rasilimali za umma kwa manufaa ya umma badala ya binafsi.

Rai hiyo imetolewa na Kaimu Katibu Tawala wa mkoa wa Mbeya Bwana Donald Bombo wakati akifungua mafunzo elekezi kwa waajiriwa wapya wa kada ya Uhandisi iliyohusisha mikoa ya nyanda za juu kusini.

Alisema kuwa iwapo watumishi wa umma wataweza kuzingatia taratibu za ufanyajikazi wao wataweza kutoa huduma bora kwa wananchi na hivyo kusaidia kuondoa malalamiko kutoka kwa wananchi.

“Ni imani yangu baada ya mafunzo haya mtaweza kutumia vizuri muda wenu wa kazi katika kutoa huduma bora kwa wananchi lakini na kuhakikisha mnasimamia kwa umakini rasilimali za umma ziweze kutumika kama ilivyokusudiwa” Alisema Bombo.

Hata hivyo aliwataka watumishi hao kuyatumia mafunzo hayo katika kuboresha utendajikazi wao kwa kuhakikisha wanafuata misingi na kanuni zilizowekwa za utumishi wa Umma katika utekelezaji wa majukumu yao.

Kwa upande wake Mkurugenzi Msaidizi Rasilimali watu kutoka Ofisi ya Rais na Tawala za mikoa Bwana Marko Masaya alisema kuwa wahandisi hao wataweza kujifunza mada mbalimbali ikiwemo kanuni za utumishi wa umma,maadili  ya utumishi .

“Watakwenda kujifunza pia mahusiano kati yao na watendaji na viongozi wa kisiasa,mawasiliano katika utumishi wa umma,pamoja nan a dhana nzima ya rushwa ili kuweza kuona namna wanavyoweza kuiepuka” Alisema Masaya.

Mada mbalimbali ziliwasilishwa katika mafunzo hayo ikiwemo mada ya Mawasiliano katika utumishi wa Umma, Uongozi na Uwajibikaji katika Utumishi wa Umma na Mahusiano kati ya Viongozi wa kisiasa na Watendaji katika Sekretarieti za Mikoa,Mamlaka za Serikali za Mitaa na TARURA zilizowasilishwa na Bwana Petro Nziku Mkufunzi kutoka Chuo Cha Serikali za Mitaa na Mada ya Mfumo wa Ujifunzaji Kieletroniki (MUKI) iliyotolewa na Bwana Silver Leole Kaimu Mkuu wa Kitengo cha TEHAMA kutoka Chuo Cha Serikali za Mitaa.

Mafunzo hayo kwa watumishi wapya wa kada ya uhandisi yalianza kutolewa mikoa ya Kanda ya Kusini katika Mkoa wa Mtwara,Mikoa ya Kanda ya Kaskazini yalifanyika mkoani Tanga, Mikoa ya Kanda ya Ziwa yalifanyika mkoani Mwanza na kwa mikoa ya nyanda za juu Kusni yamefanyika mkoani Mbeya.