Karibuni LGTI kujiunga na Shahada kwa Mwaka wa Masomo 2022/2023

Posted on: June 21st, 2022

Mara baada ya dirisha la udahili awamu ya kwanza kwa ngazi ya shahada kufunguliwa rasmi, wahitimu mbalimbali wametakiwa kuanza kufanya maombi ya kujiunga na Chuo cha Serikali za Mitaa kwa ajili ya mwaka wa masomo 2022/2023 yanayotarajiwa kuanza kuanzia mwezi Oktoba mwaka 2022.

Hayo yamesemwa leo na Naibu Mkuu wa Chuo Taaluma Dkt.Michael Msendekwa alipokuwa anazungumza na mwandishi wa habari hii ofisini kwake wakati akielezea jinsi Chuo kilivyojipanga kuwapokea wanafunzi katika mwaka mpya wa masomo.

"Napenda kuwafahamisha wanafunzi wote waliomaliza kidato cha sita na diploma kwa miaka ya nyuma waanze kufanya udahili katika Chuo cha Serikali za Mitaa ili wajiunge na shahada katika fani za Utawala katika Serikali za Mitaa, Maendeleo ya Jamii na Rasilimali Watu" Alisema Dkt.Msendekwa. 

Akiongelea kuhusu sifa za kujiunga na Chuo Naibu Mkuu huyo wa Chuo alisema kuwa kwa wale waliohitimu kidato cha sita wanatakiwa kuwa na ufaulu katika masomo angalau mawili yenye jumla ya alama 4 (kuanzia D mbili) na kwa wale wahitimu wa ngazi ya diploma sifa ni angalau ufaulu wa G.P.A 3.0.

Kuhusu miundo mbinu ya kutosheleza wanafunzi Naibu Mkuu wa Chuo alisema kuwa Chuo kina miundombinu ya kutosha kwani kina madarasa makubwa ya kisasa yanayokithi mahitaji ya idadi ya wanafunzi wengi na wa hali zote pia kuna mabweni ya kutosha wanafunzi wengi.

"Kuhusu miundombinu Chuo kimejipanga kwa kujenga madarasa na mabweni ya kutosha yanayokithi hali ya kila mwanafunzi, pia tumejenga njia kwa ajili ya walemavu wa miguu na tumehakikisha tumenunua mashine nyingi za maandishi ya nukta nundu kwa ajili kutumiwa walemavu wa macho. Aliongeza Naibu Mkuu wa Chuo huyo.

"Napenda kuwasisitiza kutuma maombi yao kwa njia ya mtandao kwani njia hii ni rahisi kwani kila muombaji anaingiza taarifa zake mwenyewe kwa kutumia simu janja (Smart phone) au Kompyuta yake na kama amekosea anaweza kurekebisha huko huko alipo na kama vifaa vyote hivyo hana anaweza kutembelea sehemu wanayotoa huduma ya Internet na kufanyiwa maombi hayo kwa gharama ndogo tu" Alisisitiza Dkt.Msendekwa.

Dirisha la udahili wa wanafunzi limefunguliwa kwa ngazi zote kuanzia ngazi ya Cheti hadi ngazi ya shahada na kwa yoyote anayehitaji kufanya maombi bonyeza hapa:-Maombi kwa njia ya Mtandao