BARAZA LA WAFANYAKAZI LGTI LAPATIWA MAFUNZO

Posted on: December 30th, 2022

Wajumbe wa Baraza la wafanyakazi la Chuo cha Serikali za Mitaa (LGTI) leo ijumaa wamepatiwa mafunzo mbalimbali juu ya umuhimu wa wao kushiriki vikao vya baraza kwa lengo la kuisadia manajimenti kuhusu mambo mbalimbali katika uendeshaji wa Chuo.

Akifungua mafunzo hayo Kaimu Mkuu wa Chuo hicho Dkt.Mashala L.Yusuph aliwataka wajumbe hao wa baraza kuzingatia wanachufundishwa ili wakiwa kwenye mijadala ya vikao halali vya baraza wapate kutoa mawazo na maoni ya wanaowawakilisha ili mawazo hayo yaweze kufanyiwa kazi na manajimenti kwa maendeleo ya Chuo cha Serikali za Mitaa.

“Ndugu wajumbe wa baraza la wafanyakazi tushiriki mafunzo haya ipasavyo,tuwe wasikivu tupate uelewa wa kina ili tushirikiane kuindesha taasisi yetu” Alisema Dkt.Mashala.

Akiwaongelea watoa mada kutoka Chuo cha Wafanyakazi Tanzania - Mbeya (Tanzaia Labour College) Kaimu Mkuu aliwaahidi kuwapa ushirikiano kipindi chote cha mafunzo kwani mafunzo hayo yatawasaidia wao kama baraza la wafanyakazi kupata ujuzi wa namna bora ya kukisadia chuo katika kukiletea mabadiliko chanya.

Akitoa mada ya kwanza Mkuu wa Chuo cha Wafanyakazi Bwana Hezron Kaaya aliwataka wajumbe hao wa baraza la wafanyakazi kujua kuwa ustawi wa wafanyakazi unahitaji zaidi maridhiano na maafikiano kuliko mapambano na waajiri hivyo baraza hilo linapaswa kujua madhumuni makuu kwao ni kutetea haki na maslahi ya wafanyakazi.

“Ndugu zangu ili uwe kiongozi mzuri wa baraza la wafanyakazi lazima uwe elimu ya kutosha juu ya wafanyakazi kuhusu haki na maslahi yao lakini pia mnapaswa kujua lazima mwajiri na mfanyakazi wawe na lengo linalofanana” Alisema Bwana Kaaya.

Kwa upande wake Mratibu wa mafunzo kutoka Chuo cha wafanyakazi Bi.Martha Lwitiko aliwaambia wajumbe hao wa baraza la wafanyakazi la Chuo cha Serikali za Mitaa kuwa lazima watambue umuhimu wa kutoa huma nzuri kwa wateja wa ndani  na nje ya Chuo cha Serikali za Mitaa ili kuweza kuongeza wateja katika taasisi kwani taasisi kama Chuo kinategemea kuendeshwa kwa ada za wanafunzi hivyo kwa kuwapa huduma bora bora wateja hao wa nje kutapelekea kuizungumzia vyema taasisi na hivyo kuvutia wateja wengi zaidi kujiunga na kuongeza mapato ya taasisi.

Akitoa shukrani kwa wakufunzi hao kwa niaba ya wajumbe Katibu wa Baraza la wafanyakazi la Chuo cha Serikali za Mitaa Dkt. Mfungo Bahati alisema kuwa wameyapokea mafunzo hayo na yatawasaidia kuendelea ufanisi katika majukumu yao, yatadumisha umoja baina ya wafanyakazi na mwajiri na kuwataka wajumbe wenzake kuwa mabalozi wazuri kwa wafanyakazi waliowawakilisha ili baraza hilo liwe chachu ya mabadiliko chanya ya maendeleo ya chuo hicho.

Mafunzo hayo yatafuatiwa na kikao cha baraza la wafanyakazi yatakayofanyika Chuoni hapo siku ya jumamosi tarehe 31 Disemba,2022.

Mabaraza ya Wafanyakazi yapo kisheri na Shirikisho la wafanyakazi limeundwa rasmi mwaka 1955.