Waziri TAMISEMI atoa ahadi ya ujenzi wa bweni Hombolo

Posted on: November 26th, 2021

Waziri wa Nchi Ofisi ya Rais- TAMISEMI Mhe. Ummy Mwalimu (Mb) jana tarehe 25/11/2021 ametoa ahadi ya ujenzi wa bweni kwa mwaka wa fedha 2022/2023 katika Chuo Cha Serikali za Mitaa lenye uwezo wa kulaza wanafunzi 2500 ili kuondoa tatizo la uhaba wa mabweni chuoni hapo.

Waziri Ummy ameyasema hayo alipokuwa akihutubia wanafunzi na wananchi mbalimbli waliojitokeza  katika mahafali ya 13 ya Chuo Cha Serikali za Mitaa kilichopo Hombolo mkoani Dodoma.

“Haiwezekani Chuo kama hiki ambacho kipo chini ya Wizara yangu kuona wanafunzi wengi wanakaa nje ya chuo na kwa kuwa kila mwaka idadi ya wahitimu wanaongezeka kutoka wanafunzi  5751 mwaka 2019/2020 hadi wanafunzi 6021 kwa mwaka wa masomo 2020/2021, hali hii inaonyesha jinsi gani chuo hiki kilivyokuwa na umuhimu wa Mamlaka za Serikali za Mitaa, kwa hiyo lazima tutenge fedha katika bajeti ijayo ili kuhakikisha tunapunguza changamoto ya malazi katika chuo hiki” Alsema Mheshimiwa Waziri Ummy.

Pamoja na ahadi ya bweni kwa wanafunzi Mheshimiwa Waziri pia alitoaha ahadi ya kulishughulikia tatizo la barabara na maji kwa luwasiliana na waziri wa ujenzi Mheshimiwa Profesa Makame Mbarawa na Waziri wa maji Mheshimiwa Jumaa Aweso ili kulipatia ufumbuzi tatizo hilo.

“Nimesikia pia mmezungumzia tatizo la barabara na tatizo la maji hapa Hombolo,sasa haya masuala mawili niachini mimi nitakwenda kuongea na Waziri wa ujenzi Profesa Makame Mbarawa na Waziri wa maji ili tulitatue hili tatizo kwa haraka” Alisisitiza Mheshimiwa Ummy.

Pamoja na ahadi hizo Mheshimiwa Waziri pia aliwasisitiza wanafunzi wa Chuo Cha Serikali za Mitaa kusoma kwa bidii na kuwa tayari kufanya kazi katika Halmashauri yoyote watakayopata kazi kwani kuna mtindo umeibuka kwa watumishi wapya kutaka kuhamia mijini mara wapatapo kazi kwa kisingizio cha kuwafuata wenza wao.

Kwa upande wa Mwenyekiti wa Bodi ya Chuo Prof. Joseph Kuzilwa akiongea kwa mara ya kwanza tangu ateuliwe kuwa Mwenyekiti wa bodi hiyo alimshukuru Rais wa Jamhuri ya Muungano wa Tanzania Mheshimiwa Samia Suluhu Hassan kwa kumteua kuwa Mwenyekiti na kumuahidi yeye na wajumbe wenzake kuhakikisha wanamsaidia Rais majukumu ya kukisimamia Chuo kwa kufuata sheria na taratibu ili kukifanya kiwe chuo cha mfano kwa kutoa wahitimu wenye weledi nchini.

“Mheshimiwa Waziri nichukue nafasi hii kumshukuru Rais wa Jamhuri ya Muungano wa Tanzania kwa kuniteua kuwa Mwenyekiti wa bodi, Namuahidi Mheshimiwa Rais mimi na wajumbe wa bodi tutatimiza majukumu yetu kwa ufanisi na kwa kufuata sheria na taratibu za Chuo” Alisema Profes Kuzilwa.

Akisoma hutuba kwa mgeni rasmi Mkuu wa Chuo Cha Serikali za Mitaa Daktari Mpamila Madale alimshukuru Waziri kwa kukubali mwaliko wa kuwa mgeni rasmi katika mahafali hayo, pamoja na kutoa shukrani zake Dkt. Madale pia alisema kuwa kwa sasa Uongozi wa Chuo umeshajenga madarasa ya kisasa pamoja na nyumba za walimu na jengo lingine la darasa lipo kwenye hatua ya msingi na pia wanaendelea kuyafanyia ukarabati baadhi ya madarasa na mabweni.

Mahafali hayo yalitanguliwa na kongamano la wanazuoni lililofanyika chuoni hapo siku ya jumatano tarehe 24/11/2021 likiwa na mada juu ya umuhimu wa sense ya watu na makazi zoezi ambalo linatarajia kufanyika mwaka 2022 nchi nzima.

Kongamano hili liliambatana na utoaji wa zawadi kwa walimu walioandika maandiko mbalimabli pamoja na  wanafunzi waliofanya vizuri katika masomo yao.

Haya ni mahafali ya 13 ya Chuo Cha Serikali za Mitaa tangu chuo hicho kianzishwe na kwa sasa Chuo Cha Serikali za Mitaa kimeanza kutoa masomo kwa ngazi ya shahada za Maendeleo ya jamii na shahada ya Utawala na uongozi katika Serikali za katika.

Kwa picha mbalimbali za matukio ya kongamano la wanazuoni, uzinduzi wa bodi ya chuo na mahafali angalia kwenye maktaba ya picha/Photo gallery.